Jachiam Bifrun (1506-1572)

Jachiam Bifrun è stà in dals promoturs principals da la Refurmaziun, introducida en ses lieu nativ Samedan il 1551. Il 1552 ha el publitgà l'emprim text stampà en lingua rumantscha: «Una cuorta et christiauna fuorma da intraguider la giuventüna...», ina translaziun dal catechissem da Cuira che dueva iniziar la giuventetgna en la ductrina reformada, accumpagnada d'ina fibla rumantscha, la «Taefla». Il pli grond merit da Bifrun è però stada la translaziun ad agens custs dal «Nouf Sainc Testamaint» (1560). La lavur da piunier, exequida senza avair a disposiziun in vocabulari rumantsch, ha purtà ad el la renconuschientscha sco fundatur da la lingua litterara rumantscha.