Umbelliferas

Las umbelliferas èn savens d'ina grondezza particulara. L'autezza maximala (fin a 3 m) vegn cuntanschida da la darsvenna giganta, ina stretga parenta da la darsvenna cumina (maletg). Ils fritgs e savens er la feglia da las umbelliferas cuntegnan ielis eterics e sucs particulars. Sco spezaria vegnan duvrads ils fritgs dal puletg (curetg), da l'anis e dal coriandel. La ragisch a pal da la carotta è in legum fitg nutritiv e cun il finotg pon ins far in bun té. La pimpinella e l'angelica èn ervas medicinalas, e la squitta è enconuschenta sco planta da tissi. Er il sanistgel vegn prezià sco erva medicinala per umans ed animals. [Tenor Flurs da prada].

(Foto: Frank Vincentz / CC BY-SA 3.0)