Rumantsch: lingua naziunala

Ils 20 da favrer 1938 ha il pievel svizzer renconuschì il rumantsch sco lingua naziunala sper il tudestg, il franzos ed il talian. En questa votaziun istorica per la Rumantschia han ils votants (votantas na devi betg anc da quest temp) approvà cun ina maioritad da passa 90% ina revisiun da l'artitgel 116 da la constituziun federala. Questa votaziun stat a la fin da lungas debattas davart la posiziun dal rumantsch e da smanatschas na da la Germania naziunalsocialista e na da l'Italia faschista. La votaziun furma er il punct culminant d'ina nova conscienza rumantscha al cumenzament dal 20avel tschientaner. Il moto da quella aveva Peider Lansel gia formulà l'onn 1913: «Ni Italians, ni Tudaischs!».