Placi a Spescha (1752-1833)

Placi a Spescha, oriund da Trun, è stà pader benedictin en la claustra da Mustér. El ha descrit il mund alpin, ha rimnà plantas e minerals, elavurà numerusas chartas, scrittiras e skizzas. Sco alpinist èn reussidas ad el pliras primascensiuns. Placi a Spescha è s'engaschà per ovras socialas ed ha promovì l'industria da minieras. Da giuven ensi ha el studegià la lingua rumantscha ed ha sviluppà l'idea da la «naziun rumantscha» cun ina lingua da scrittira communabla. L'onn da guerra 1799 ha el simpatisà cun ils Franzos ed è vegnì deportà a Puntina sco ostagi politic. Pervia da sias activitads detg insolitas per ses temp vegniva Placi a Spescha titulà da la populaziun il «curius pader».