Pro Svizra Rumantscha

Tenor ils statuts ha l'uniun «Pro Svizra Rumantscha» (PSR), fundada l'onn 1992, l'intent da mantegnair e promover la lingua e cultura rumantscha, en spezial dentant dad edir ina gasetta quotidiana rumantscha en ils idioms existents ed en rumantsch grischun. En pli vul ella promover la litteratura, la scolaziun e la perscrutaziun rumantscha e particularmain la perfecziun da las schurnalistas e dals schurnalists rumantschs. L'uniun ha ultra da quai l'intent da garantir la quadrilinguitad da la Svizra. Ella sustegna, uschè lunsch che quai para cunvegnent, era las stentas da la Lia Rumantscha e da sias societads affiliadas.