Cauco

Il vitg da Cauco è situà a 1132 m sin la spunda sanestra da la Calancasca sin il cugn d'ina bova dal temp preistoric. Sper Cauco existan er las culegnas da Bodio (anc abitada), Lasciallo e Masciadone. A Cauco existivan intgins mulins ed ina traja per elavurar il crap da lavetsch. Menziun speziala meritan era las numerusas aclas da Cauco (oz abandunadas) che servivan antruras a l'economia d'alp; quella constituiva, cun l'allevament da muvel e l'emigraziun periodica, la basa economica principala da la populaziun. Dapi il 2015 fa Cauco part da la vischnanca Calanca. [Tenor e-lir].

(Foto: Adrian Michael / CC BY-SA 3.0)